БИЗНИНГ “АҒАЙ”

Бир вақтлар вилоят ижодкорлари ўртасидаАғайдея яхши танилган қадрли устозим, раҳматли Раҳим оға Довутбековни эслаганда, халқнингЯхшилик қил, дарёга ташла, билса холиқ, билмаса балиқ”, деган гапи ёдимда туш­ди. Негаки, бу нақл айнан лавҳамиз қаҳрамо­нига тааллуқлидек. Ҳаётда, замондошлари ва шогирдлари қалбида ўчмас из қолдира олган устозимиз болалиги бол тотган онглариданоқ халқ хизматида бўлган.

 

Сўлим Янгибозор фарзан­ди Раҳим оға меҳнат фаолия­тини урушдан аввалги йиллар болалар оромгоҳи етакчили­гидан бошлаган эди. Ватанга, халққа садоқати боис, йигит чоғида ишлаб турган гулдек юмушини ташлаб, уруш жанггоҳларига отланади. Окоплар­да чанг ютиб, ўқлар ёмғири остида қолиб, қурол қучоқла­ган дамларида ҳам ижод қил­ган, ўланлар ёзган.

 

Жанггоҳлардан ғалаба билан қайтган “Ағай” яна ўз умрини маънавий-маърифий ишлар билан боғлайди. Суяги ҳукумат идораларидаги ма­шаққатли меҳнат жараёнла­рида қотган заҳматкаш инсон 1969 йилда ўша кезлардаги “Олға”, кейинчалик “Суръат” деб аталган, ҳозирда “Юқо­ри Чирчиқ ҳаёти” номи би­лан чоп этилаётган газетага муҳаррир бўлиб келади. Де­ярли умрининг охирига қадар мана шу мўътабар минбардан сўз айтади. Ўнлаб шогирдлар етиштирди.

 

Дарвоқе, ёш улғайган сари кўнгил деганлари бил­лур шишадек серсадо бўлиб бораверар экан. Салгина те­гиб кетсанг, ўзидан ғайрита­биий сас таратади. Устозим, Ўзбекистонда хизмат кўрсат­ган маданият ходими Раҳим оға Довутбеков ҳақидаги мўъжазгина ёдноманинг иб­тидосидаёқ дилимда ана шундай ҳодиса рўй берди. Эсимни таниб, қоғоз қирти­шлай бошлаганимдан бери қалбимнинг бебаҳо гавҳари­га айланган у зотнинг порлоқ хотираси каминани ўтмиш­га сайр қилдириб, киприкларимни намлади. Алҳол, кўнгил торлари чертилди. Билмадим, бу соғинчми ёки армон? Ҳар не бўлганда ҳам шунга ўхшаш қандайдир бир туйғу каминани хотира сандиғини титкилашга унда­ди ва байрам баҳона жойи жаннатдан бўлгур “Ағай”нинг руҳи покларига ҳамиша кўн­гил кўшкидасиз устоз, дея изҳори дил қилгим келади.

Жамолиддин АБДИЕВ,

“Юқори Чирчиқ ҳаёти” газетаси бош муҳаррири

СУРАТДА: Р. Довутбеков.

2020-07-02T15:59:38+00:00