БОШ МЕЗОН –  Х О Л И С Л И К  В А  Ҳ А Қ Қ О Н И Й Л И К

Ангрен шаҳрининг Янгиобод ҳудудида жой­лашган “Шамшод” мажмуасида Матбуот ва оммавий ахборот воситалари ходимлари куни му­носабати билан журналистлар, блогерлар ва соҳа вакиллари учун медиа-тур ва байрам тадбири ўтказилди.

Вилоят ҳокимлиги томонидан каран­тин қоидаларига қатъий риоя қилган ҳолда ташкил этилган маросимда мам­лакатимиз ва вилоятимиз оммавий ахбо­рот воситаларида ўз шарафли касбини ардоқлаб меҳнат қилаётган ижодкорлар, газета ва журналлар, телерадиоканал­лар фидойилари, соҳа фахрийлари ва ёшлар иштирок этишди.

Тантанали маросимда вилоят ҳокими ўринбосари Жамшид Абдусаломов соҳа ходимларини касб байрамлари билан самимий муборакбод этиб, Президенти­миз томонидан олиб борилаётган ҳаёт­бахш ислоҳотлар бўйича вилоятимизни ижтимоий-иқтисодий ривожлантириш мақсадида амалга оширилаётган ишлар ҳақида оммавий ахборот воситалари ва ижтимоий тармоқлар орқали аҳолини хабардор қилишни янада кучайтириш кераклиги хусусида тўхталди. Жумла­дан, йилдан-йилга вилоятга инвестиция киритиш миқдори ўсиб бораётгани, ҳо­зирда шаҳар ва туманларда 70 трлн. сўм миқдоридаги 1 минг 221 та лойиҳа амал­га оширилаётгани, бу ўтган йилнинг шу даврига нисбатан 28 фоизга юқорилиги­ни таъкидлади.

Шунингдек, тадбирда сўз олган ви­лоят ҳокими ўринбосари Сайфиддин Низомов ҳозирги пандемия шароитида регионда ички туризмни ривожланти­риш бўйича олиб борилаётган ишларни кенг ёритиш, яшил ҳудудлардаги дам олиш масканларига сайёҳларни жалб этишда ҳам журналист ва блогерларнинг иштироки зарурлигини қайд этди.

Таъкидланганидек, ҳақиқий журна­листнинг меҳнати оғир ва машаққатли­дир. Шу ўринда Президентимиз раҳбар­лигида бошланган жуда катта кўламли ислоҳотлар, шиддаткор янгиланиш ва юксалиш жараёнларининг моҳиятини халқимизга етказиш, одамларда мана шу ўзгаришларга дахлдорлик туйғуларини уйғотиш ва шакллантиришда оммавий ахборот воситаларининг ўрни ва аҳамия­тини ҳеч нарса билан қиёслаб бўлмайди.

Шуни чуқур англаган ҳолда, давлати­миз раҳбари ўзларининг деярли ҳар бир чиқишларида журналистларимизни жа­мият ҳаётида фаол бўлишга, ҳар бир ма­салада холис ва ҳозиржавоб фикр юри­тишга, ютуқларимиз билан бир қаторда жойлардаги мавжуд камчилик ва муам­моларни рўй-рост кўрсатиб, уларни бар­тараф этишда самарали жамоатчилик назоратини ўрнатишга, бир сўз билан айтганда, ҳаётимизнинг том маънодаги кўзгуси бўлишга даъват этадилар.

– Дарҳақиқат, давлатимиз раҳбари ҳар йили сана муносабати билан соҳа ходимларига йўллайдиган табригида бизни янада ҳозиржа­воб, тезкор ва фаол бўлишга руҳлантирадилар, – дейди вилоят Ахборот ва оммавий коммуникациялар бошқарма­си бошлиғи Зарифа Эралиева. – Кечаги табрикда ҳам: “Биз бугун ҳуқуқий демократик давлат қураётган эканмиз, жур­налистиканинг бутун дунёда эътироф этилган, ўзгармас талаб ва мезонларига амал қилишимиз зарур. Бу мезонларнинг энг асосийси – холислик ва ҳаққоний­ликдир. Бинобарин, матбуот майдонига кирган инсон – у журналист бўладими, блогер бўладими, бундан қатъи назар – ана шу қоидаларга амал қилиши шарт”, дея бизларга жуда катта ишонч билди­риб, масъулият юкладилар. Эндиги ва­зифамиз ана шу ишонч ва масъулиятни меҳнатимиз билан оқлашдир.

Маросимда республика ва вилоят босма оммавий ахборот воситалари, ҳу­дудий нашрларда меҳнат қилаётган касб фидойилари, журналист ва блогерлар ҳамда соҳа фахрийларига турли номи­нациялар бўйича вилоят ҳокимлигининг фахрий ёрлиғи, махсус статуэтка ва эсдалик совғалари топширилди.

Кумуш САЛОМОВА

/Тошкент ҳақиқати/

Аброр ЭСОНОВ олган сурат

2020-07-02T10:45:56+00:00